पर्यटन संचालनालयाच्या ‘आई’ पर्यटन धोरणामुळे महिलांना उद्योजिका बनण्याची संधी

 पर्यटन संचालनालयाच्या ‘आई’ पर्यटन धोरणामुळे

 महिलांना उद्योजिका बनण्याची संधी

अधिक माहितीसाठी https://www.mtdc.co/en/ संकेतस्थळ उपलब्ध 

अमरावती, दि.30 :  पर्यटन क्षेत्रात महिलांसाठी अनेक रोजगाराच्या संधी उपलब्ध आहेत. महिलांमध्ये उद्योजकता आणि नेतृत्व गुण विकसित करण्याच्या दृष्टीकोनातून महाराष्ट्र शासनाच्या पर्यटन विभागामार्फत महिलांच्या सक्षमीकरणासाठी ‘आई’ महिला केंद्रीत पर्यटन धोरण जाहीर करण्यात आले आहे. सदर धोरण पर्यटन संचालनालय व महाराष्ट्र पर्यटन विकास महामंडळसद्वारे राबविण्यात येणार आहे.

या धोरणामध्ये महिलांसाठी पर्यटन विकास धोरणाची पंचसूत्री जाहीर केली असून महिलांना आर्थिक सक्षम करण्यासाठी वेगवेगळ्या सवलती  दिल्या जाणार आहेत. या धोरणाची प्रभावी अंमलबजावणी करण्यासाठी कृती आराखडा तयार करुन उपाययोजना सुचविणे व सहनियंत्रण करण्यासाठी पर्यटनमंत्र्यांच्या अध्यक्षतेखाली एक कार्यदल समिती स्थापन करण्यात आली आहे.

                               अ गट- पर्यटन संचालनालयामार्फत देण्यात येणारे प्रोत्साहन व सवलती

पर्यटन क्षेत्रातील महिला उद्योजकांचा सहभाग वाढविण्यासाठी राज्यातील प्रत्येक तालुक्यातील पर्यटन संचालनालयकडे नोंदणीकृत महिलांच्या मालकीच्या व त्यांनी चालविलेल्या 10 पर्यटन व्यवसायांना (होमस्टे, हॉटेल, रेस्टॉरेंट, टुर्स ॲन्ड ट्रॅव्हल कॅराव्हॅन, बिच शॅक, साहसी पर्यटन (समिन, हवा, जल) पर्यटन सुविधा केंद्र, कृषी पर्यटन केंद्र, होम स्टे, बी ॲण्ड बी, रिसार्ट, मोटेल हाऊस बोट, टेंट ट्री हाऊस, पर्यटन व्हिला, एजन्सी इ.) पर्यटन व्यवसाय उभारणीसाठी मान्यता प्राप्त बॅंकामार्फत घेतलेल्या रु. 15 लाखपर्यंतच्या कर्जाच्या रकमेवरील व्याजाची रक्कम 12 टक्के मर्यादेत त्यांच्या आधार लिंक बँक खात्यात पूर्ण कर्ज परतफेड होईपर्यत किंवा 7 वर्षे कालावधीपर्यत किंवा व्याजाची रक्कम रु. 4.5 लक्षच्या मर्यादेपर्यंत या तीन पर्यायापैकी जे आदी घडेले तो पर्यत दरमहा पुढील अटींच्या अधिन राहून जमा करण्यात येईल.

पर्यटन व्यवसाय पर्यटन संचालनालयाकडे नोंदणीकृत असला पाहिजे, पर्यटन व्यवसाय महिलांच्या मालकीच्या व त्यांनी चालविलेल्या असला पाहिजे, महिलांच्या मालकीच्या हॉटेल/रेस्टॉरेंट्समध्ये 50 टक्के व्यवस्थापकीय व इतर कर्मचारी महिला असणे आवश्यक राहील. महिलांच्या मालकीच्या टूर्स ॲन्ड ट्रॅव्हल  एजन्सीमध्ये 50 टक्के कर्मचारी महिला असणे आवश्यक राहील, पर्यटन व्यवसायाकरीता आवश्यक सर्व परवानग्या प्राप्त असाव्यात, कर्जाचे हप्ते वेळेत भरले पाहिजे.

पर्यटन संचालनालयाकडे नोंदणीकृत पर्यटन व्यवसायामध्ये कार्यरत असलेल्या महिलांना केंद्र, राज्य शासनाच्या विमा योजनेमध्ये सहभागी करुन त्यांचा वार्षिक विमा हप्ता पहिले 5 वर्षे भरण्यात येईल.

 

ब गट- महाराष्ट्र पर्यटन विकास महामंडळामार्फत प्रोत्साहन व सवलती

महाराष्ट्र पर्यटन विकास महामंडळांचे औरंगाबाद येथील पर्यटन निवास, राज्यातील प्रथम पूर्णत: महिला संचालीत पर्यटन निवास म्हणून व खारघर रेसिडीन्सीचे अर्का रेस्टॉरेंट पूर्णत: महिला संचालीत म्हणून चालविण्यात येईल.

महाराष्ट्र पर्यटन विकास महामंडळाच्या टूर ऑपरेटरमार्फत आयोजित पर्यटन सर्किट, पॅकेजेस मध्ये महिला पर्यटकांना 20 टक्के सुट देण्यात येईल. या 20 टक्के सवलतीची रक्कम महाराष्ट्र पर्यटन विकास महामंडळाद्वारे टूर ऑपरेटरला दिली जाईल. खर्चाची  प्रतीपूर्ती महामंडळास शासनाकडून करण्यात येईल.

महामंडळाच्या रिसोर्ट, युनिट्समध्ये आंतरराष्ट्रीय महिला दिनानिमित्त 1 ते 8 मार्च या कालावधीत तसेच वर्षाभरात इतर 22 दिवस अश्याप्रकारे एकूण 30 दिवस फक्त ऑनलाईन बुकिंगमध्ये 50 टक्के सुट देण्यात येईल. महाराष्ट्र पर्यटन विकास महामंडळाच्या मालमत्तेच्या ठिकाणी महिला बचतगटांना हस्तकला, कलाकृती, प्रक्रिया केलेले खाद्यपदार्थ इत्यादींच्या विक्रीसाठी स्टॉल, जागा उपलब्ध करुन देण्यात येईल.

अमरावती विभागातील सर्व पर्यटन महिला उद्योजकांनी जे हॉटेल रिसोर्ट, होम स्टे, कृषी पर्यटन केंद्र, साहसी पर्यटन केंद्र, उपहारगृह, टूर गाईड, टूर ऑपरेटर अशा पर्यटन क्षेत्रात कार्यरत असलेल्या, नविन व्यवसाय करु इच्छित असलेल्या महिला उद्योजकांनी व्याजाचा परतावा घेण्यासाठी विहित नमुन्यातील अर्ज करण्याचे आवाहन अमरावती विभाग पर्यटन संचालनालयाचे उपसंचालक प्रशांत सवाई यांनी केले आहे. या संधीचा अधिकारी महिला पर्यटन उद्योजकांनी घ्यावा, असे आवाहनही विभागाव्दारे करण्यात आले आहे.

00000

रोलर स्केटींग स्पिड इनलाईन स्पर्धेत राज्यात ‘रुचिका वासनिक’ची उत्तुंग भरारी

 

रोलर स्केटींग स्पिड इनलाईन स्पर्धेत

राज्यात ‘रुचिका वासनिक’ची उत्तुंग भरारी

 

अमरावती, दि. 27 : नुकत्याच पार पडलेल्या स्पिड स्केंटीग इनलाईन ऑफ महाराष्ट्राच्या वतीने घेण्यात आलेल्या 33 व्या राज्यस्तरीय स्केंटीग स्पिड इनलाईन स्पर्धेत अमरावतीच्या कु. रुचिका मनोज वासनिक हिने दहा किलोमीटर पॉईंट टु पॉईंट प्रकारात सुवर्ण पदक तसेच रोड एकीमेशन व  रिक इलिमेशन प्रकारात काँस्य पदक पटकावून स्केटींग या खेळात अमरावती जिल्ह्याचे नाव रोशन केले आहे. तीच्या या नावलौकीक यशाबद्दल क्रीडा क्षेत्रातील तज्ज्ञांनी व खेळाडूंनी भरभरुन कौतुक होत आहे.

मुंबई विरार येथे दि. 19 ते 22 नोव्हेंबर दरम्यान सपन्न झालेल्या राज्यस्तरीय स्केटींग क्रीडा स्पर्धांचे आयोजन करण्यात आले होते. कु. रुचिका वासनिक हिने 4 ते 17 वर्षे वयोगटात अमरावती डिस्ट्रीक्ट स्केटींग असोशिएशनकडून सहभाग नोंदविला होता.

कु. रुचिका ही आपल्या स्केटींगचा सराव येथील जिल्हा स्टेडियमच्या स्केंटीग रिकवर सायंकाळी 7 ते 8.30 दरम्यान श्याम भोकरे सरांच्या मार्गदर्शनात करीत असते. तीने या आपल्या यशाचे श्रेय असो.चे अध्यक्ष दिलीप खत्री, उपाध्यक्ष रत्नाकर शिरसाट, सचिव श्याम भोकरे, सहसचिव स्वपनिल भोकरे,प्रा. निळकंट चौधरी सर, किशोर बोरकर सौ. भारती हबर्डे, व मनिबाई गुजराती हायस्कूलच्या मुख्याध्यापिका सौ. अंजली देव मॅडम, व सर्व शिक्षक व शिक्षिका तसेच क्रीडा उपसंचालक संतान सर जिल्हा क्रिडा अधिकारी गणेश जाधव सराना व आपल्या आई-वडिलांना दिले. तिचे संपूर्ण अमरावती जिल्ह्यातून कौतूक होत आहे.

0000

 

नवमतदारांनी मतदार यादीत नाव नोंदवावे -जिल्हाधिकारी सौरभ कटियार

 

मतदार यादीचा विशेष संक्षिप्त पुनरीक्षण कार्यक्रम-2024 

नवमतदारांनी मतदार यादीत नाव नोंदवावे

              -जिल्हाधिकारी सौरभ कटियार

* जिह्यात विविध ठिकाणी विशेष नोंदणी शिबीराचे आयोजन

* विभागीय आयुक्तांकडून निवडणुक कामकाजांचा आढावा

 

          अमरावती, दि. 25 : लोकशाही बळकट करण्यासाठी प्रत्येकाने मतदानाचा हक्क बजाविणे आवश्यक आहे. त्यासाठी 17 व 18 वर्षे पूर्ण करणाऱ्या नव मतदारांनी मतदार यादीत त्यांच्या नावाची अवश्य नोंदणी करावी, असे आवाहन जिल्हाधिकारी सौरभ कटियार यांनी आज येथे केले. जिल्ह्यातील सर्व मतदानकेंद्रात मतदारांच्या नोंदणीसाठी आयोजित विशेष शिबीराचा सर्वांनी लाभ घ्यावा, असेही त्यांनी सांगितले.

           

येथील शासकीय अभियांत्रिकी महाविद्यालयात आयोजित विशेष नोंदणी शिबीराची जिल्हाधिकाऱ्यांनी आज पाहणी करुन विद्यार्थ्यांना संबोधित केले. त्यावेळी ते बोलत होते. शासकीय अभियांत्रिकी महाविद्यालयाचे प्राचार्य डॉ. आशिष महल्ले, डॉ. पंजाबराव देशमुख प्रशिक्षण व विकास प्रबोधिनीचे संचालक तथा समन्वय अधिकारी अजय लहाने, उपजिल्हा निवडणूक अधिकारी शिवाजी शिंदे, उपजिल्हाधिकारी रणजित भोसले, उपविभागीय अधिकारी अनिल भटकर, तहसीलदार विजय लोखंडे यांच्यासह महाविद्यालयाचे विद्यार्थी- विद्यार्थींनी यावेळी उपस्थित होते.

            जिल्हाधिकारी श्री. कटियार म्हणाले की, आगामी लोकसभा निवडणुकीच्या अनुषंगाने भारत निवडणूक आयोगाकडून मतदार यादी संक्षिप्त पुनरिक्षण कार्यक्रम जाहीर करण्यात आला आहे. त्यानुसार नव मतदारांच्या नोंदणीसाठी 27 ऑक्टोबर ते 9 डिसेंबर दरम्यान विशेष शिबीरांचे आयोजन करण्यात आले आहे. या कालावधीत 1 जानेवारी 2024, 1 एप्रिल 2024, 1 जुलै 2024 तसेच 1 ऑक्टोंबर 2024 या अर्हता दिनांकास 18 वर्षे पूर्ण करणाऱ्या नव मतदारांनी, विद्यार्थ्यांनी मतदार यादीत त्यांच्या नावाची नोंदणी करावी. तसेच जे मतदार इतर मतदार संघात स्थांनातरित झाले आहे किंवा इतर मतदार संघातून या ठिकाणी आले आहेत, अशांचा शोध घेऊन मतदार यादींचे नुतणीकरण करण्यात येणार आहे. त्यासाठी जिल्ह्यातील सर्व मतदारांनी आपले नाव मतदार यादीत आहे किंवा नाही याची तपासणी करावी. काही सुधारणा करावयाची असेल तसे संबंधित मतदान केंद्राधिकारी यांना कळवावे, असेही श्री. कटियार यांनी यावेळी सांगितले.

               पुढे बोलताना ते म्हणाले की, मतदार नोंदणीसाठी जिल्हा प्रशासनाव्दारे विविध उपक्रमांच्या माध्यमातून जनजागृती करण्यात येत असून विशेष शिबिरांचेही आयोजन करण्यात येत आहे. त्याचा नागरिकांनी लाभ घेऊन आपले नाव मतदार यादीत नोंदवावे.

 भारत निवडणूक आयोगाव्दारे मतदार नोंदणी व मतदार कार्ड मिळण्यासाठी ऑनलाईन सुविधाही उपलब्ध करुन दिली आहे. त्याचा सर्वांनी लाभ घ्यावा. नागरिकांना मतदार यादीत नाव समाविष्ट करण्यासाठी नमूना 6, नमूना 7 ग्राम, तालुका व जिल्हास्तरावरील सर्व मतदान केंद्रावर व महसूल विभागाच्या निवडणूक शाखेत उपलब्ध करुन देण्यात आला आहे, असे श्री. कटियार यांनी सांगितले.

            महाविद्यालयीन विद्यार्थी-विद्यार्थीनींनी मतदानाचे महत्व इतरांना पटवून देत मतदार नोंदणीसाठी जनजागृती करावी. विद्यार्थ्यांनी महाविद्यालयात ‘मतदार जनजागृती क्लब’ची स्थापना करावी. ‘मतदार जनजागृती मित्र’ म्हणून याविषयी इतरांना मार्गदर्शन करावे. महाविद्यालयीन विद्यार्थ्यांनी पथनाट्याच्या सादरीकरणातून मतदानाच्या जनजागृतीसाठी प्रशासनाला सहकार्य करावे, असे आवाहनही जिल्हाधिकाऱ्यांनी यावेळी केले.

विभागीय आयुक्तांकडून निवडणूक कामकाजांचा आढावा

व मतदान केंद्रास भेट

 

            तत्पूर्वी मतदार यादी निरीक्षक तथा विभागीय आयुक्त डॉ. निधी पाण्डेय यांनी जिल्हाधिकारी कार्यालयात आयोजित बैठकीत मतदार यादी पुनरीक्षण कार्यक्रमांतर्गत झालेले कामकाज, स्वीप मोहिम, तालुकानिहाय मतदारांची संख्या, मतदान केंद्रे, मतदान जागृती आदीबाबत आढावा घेतला. जिल्हाधिकारी श्री. कटियार यांनी सादरीकरणाच्या माध्यमातून उपरोक्त बाबींची माहिती दिली. त्यानंतर डॉ. पाण्डेय यांनी बडनेरा मतदार संघातील सामरा हायस्कुल येथील मतदान केंद्राला प्रत्यक्ष भेट देऊन पाहणी केली. तसेच मतदार नोंदणीबाबत आवश्यक सूचना दिल्या.

00000

 

कृषी विभागाच्या सहाय्यक अधिक्षक पदाचा निकाला जाहीर

                              कृषी विभागाच्या सहाय्यक अधिक्षक पदाचा निकाला जाहीर

 

        अमरावती, दि. 23 : कृषि विभागाच्या अधिनस्त अमरावती विभागातील सहाय्यक अक्षीक्षक पदाचा निकाल उद्या दि. 24 नोव्हेंबरला कृषी विभागाच्या www.krishi.maharashtra.gov.in या संकेतस्थळावर जाहीर करण्यात येणार आहे. संबंधित उमेदवारांनी याची नोंद घ्यावी, असे आवाहन विभागीय कृषी सहसंचालक किसन मुळे यांनी केले आहे.

            कृषि विभागातील कृषि आयुक्तालयाच्या अधिनस्त विभागीय कृषि सहसंचालक, अमरावती विभाग अमरावती यांच्या आस्थापनेवरील भुतपूर्व दुय्यम सेवा मंडळाच्या कक्षेतील गट-क संवर्गातील सहाय्यक अधिक्षक या संवर्गातील पदांसाठी सरळसेवेने पदभरतीसाठी जाहीरात दि. 3 एप्रिल 2023 रोजी प्रसिध्द करण्यात आली होती, सदर जाहीरातीस अनुसरुन दि. 25 सप्टेंबर 2023 या दिवशी इंस्टीटयुट ऑफ बँकिंग पर्सेनल सिलेक्शन (आय.बी.पी.एस.) संस्थे मार्फत विविध परिक्षा केंद्रावर परिक्षा घेण्यात आली होती.

इंस्टीटयुट ऑफ बँकिंग पर्सेनल सिलेक्शन (आय.बी.पी.एस.) संस्थेकडुन सदर परिक्षेचे निकालपत्रक प्राप्त झालेले असुन सदर निकालपत्रक व किमान 45 टक्के गुण धारण करणाऱ्या उमेदवारांची गुणवत्ता यादी कृषि विभागाच्या www.krishi.maharashtra.gov.in या संकेतस्थळावर दि. 24 नोव्हेंबर 2023 पासुन प्रसिध्द करण्यात येत आहे. त्यानंतर निवडसुची व प्रतिक्षासुची प्रसिध्द करण्यात येईल, याची सर्व उमेदवारांनी नोंद घ्यावी, असेही विभागाद्वारे कळविण्यात आले आहे.

000000

न्यायमूर्ती संदीप शिंदे (निवृत्त) यांनी घेतला अमरावती विभागाचा कुणबी विषयक आढावा

 

                        न्यायमूर्ती संदीप शिंदे (निवृत्त) यांनी घेतला

अमरावती विभागाचा कुणबी विषयक आढावा

 

अमरावती, दि.22 : मराठा-कुणबी, कुणबी-मराठा जातीचे जात प्रमाणपत्र पात्र व्यक्तींना देण्याबाबतची कार्यपद्धती विहीत करण्यासाठी न्यायमूर्ती संदीप शिंदे (निवृत्त) यांच्या अध्यक्षतेखाली शासनाने समिती स्थापन केली आहे. या समितीची कार्यकक्षा संपूर्ण महाराष्ट्र राज्य करण्यात आली आहे. समितीला यासंबंधीचा अहवाल सादर करावयाचा असल्याने कुणबी, मराठा-कुणबी, कुणबी-मराठा जातीची नोंद असलेले दस्तावेज व कागदपत्रांचा  समितीचे अध्यक्ष न्यायमूर्ती संदीप शिंदे (नि.) यांनी विभागीय बैठकीत आढावा घेतला.

समितीच्या कामकाजाच्या अनुषंगाने राज्यातील महसूली विभागात दौऱ्यांचे आयोजन करण्यात आले आहे. त्यानुषंगाने येथील विभागीय आयुक्त कार्यालयात न्यायमूर्ती श्री. शिंदे यांनी मराठा-कुणबी, कुणबी-मराठा जातीच्या नोंदी, अनुषंगिक बाबींचा व कामकाजाचा आढावा घेतला. विभागीय आयुक्त डॉ. निधी पाण्डेय, विशेष पोलीस महानिरीक्षक जयंत नाईकनवरे, पोलीस आयुक्त नवीनचंद्र रेड्डी, विधी व न्याय विभागाचे सहसचिव ॲड. शेखर मुनघाटे, समिती कक्षाचे उपसचिव विजय पोवार, ॲड. अभिजीत पाटील, कक्ष अधिकारी माधुरी देशमुख यांचेसह पाचही जिल्ह्यांचे जिल्हाधिकारी, जिल्हा परिषदेचे मुख्य कार्यकारी अधिकारी व इतर इमर विभागांचे प्रमुख अधिकारी यावेळी उपस्थित होते.

न्यायमुर्ती श्री. शिंदे म्हणाले की, अमरावती विभागांतर्गत असणाऱ्या पाचही जिल्ह्यांत कुणबी व मराठा जातीच्या समाजाची लोकसंख्या अधिक प्रमाणात आहे. शासकीय विभागाकडे विशेषत: महसूल विभागाकडे असलेल्या महसूली अभिलेखांच्या सन 1948 पूर्वीच्या तसेच सन 1948 ते सन 1967 कालावधीतील मराठा-कुणबी, कुणबी-मराठा जातीच्या नोंदीची तपासणी करुन त्याबाबतचा अहवाल समितीला सादर करण्यात यावा. तसेच जिल्ह्यातील नागरिकांकडून त्यांच्याकडे उपलब्ध असलेले पुरावे, वंशावळी, शैक्षणिक व महसुली पुरावे, संस्थानिकांनी दिलेल्या सनदा, राष्ट्रीय दस्तावेज इ. जुनी अभिलेखे जिल्हाधिकारी कार्यालयातील स्थापित विशेष कक्षाने स्विकारुन त्याबाबतही अहवाल सादर करण्यात यावेत.

अमरावती विभागातील पाचही जिल्हा प्रशासनाचा याअनुषंगाने कामकाजाचा सविस्तर आढावा न्यायमूर्ती शिंदे यांनी बैठकीत घेतला. मागील पाच वर्षात मराठा, कुणबी जातीचे जात प्रमाणपत्र वितरणाचा तसेच विभागीय जात प्रमाणपत्र पडताळणी समितीकडून अवैध ठरलेल्या प्रकरणांच्या कारणांचा आढावा घेतला. प्रारंभी विभागीय आयुक्त डॉ. पाण्डेय यांनी प्रास्ताविकात कामकाजाची माहिती देवून विभागात कुणबी जातीच्या नोंदी आढळलेल्यांची संख्या 20,06,413 असल्याचे सांगितले.

यावेळी अमरावती विभागातील पाच जिल्ह्याच्या जिल्हाधिकाऱ्यांनी माहितीचे सादरीकरण करुन कुणबी जाती विषयक सांख्यिकी आणि केलेल्या कामकाजाविषयी विवेचन केले. यावेळी अधिकाऱ्यांनी प्रकरणांचे निरीक्षण, पडताळणी, तपासणी, वस्तुस्थितीबाबत समिती अध्यक्षांना सविस्तर माहिती दिली.

00000

अमरावती व बडनेरा शहरातील पाणी पुरवठा 24 नोव्हेंबरला बंद राहणार

                                                अमरावती व बडनेरा शहरातील पाणी पुरवठा

24 नोव्हेंबरला बंद राहणार

             अमरावती, दि. 21 : अमरावती पाणी पुरवठा योजनेंतर्गत सिंभोरा हेडवर्क येथे 990 किलोवॅट सौरउर्जा प्रकल्प जोडणीचे काम करावयाचे असल्याने अमरावती व बडनेरा शहराचा शुक्रवार, दि. 24 नोव्हेंबरला पाणी पुरवठा बंद राहणार आहे.

सौरउर्जा प्रकल्प जोडणीचे काम पूर्ण झाल्यानंतर दि. 25 नोव्हेंबरपासून अमरावती व बडनेरा शहरातील पाणी पुरवठा नियमित स्वरुपात सुरु राहील. तरी सर्व भागातील नागरिकांनी यांची नोंद घ्यावी व सहकार्य करावे, असे महाराष्ट्र जीवन प्राधिकरणाचे कार्यकारी अभियंता यांनी प्रसिध्दी पत्रकाव्दारे कळविले आहे.

00000

इयत्ता दहावीच्या फेब्रु-मार्च 2024 च्या परीक्षेची ऑनलाईन आवेदनपत्रे सादर करावयाच्या तारखांना मुदतवाढ

 

इयत्ता दहावीच्या फेब्रु-मार्च 2024 च्या परीक्षेची

ऑनलाईन आवेदनपत्रे सादर करावयाच्या तारखांना मुदतवाढ

      अमरावती, दि. 20 : महाराष्ट्र राज्य माध्यमिक व उच्च माध्यमिक शिक्षण मंडळामार्फत घेण्यात येणाऱ्या माध्यमिक शालान्त प्रमाणपत्र इयत्ता दहावी मार्च 2024 परीक्षेस नियमित विद्यार्थ्याची आवेदनपत्रे, पुनर्परीक्षार्थी नावनोंदणी प्रमाणपत्र (Enrollment Certificate) प्राप्त झालेले खाजगी विद्यार्थी (Private Candidate) तसेच श्रेणीसुधार योजनेअंतर्गत व तुरळक विषय घेऊन, ITI (औद्योगिक प्रशिक्षण संस्थेद्वारे Transfer of Credit घेणारे विद्यार्थी) चे विषय घेऊन प्रविष्ठ होऊ इच्छिणाऱ्या विद्यार्थ्यांचे परीक्षेचे आवेदनपत्रे ऑनलाईन पध्दतीने www.mahahsscboard.in या संकेतस्थळावर सादर करण्यास 30 नोव्हेंबरपर्यंत मुदतवाढ देण्यात आली आहे.

माध्यमिक शाळांनी नियमित विद्यार्थ्यांची आवेदनपत्रे SARAL DATABASE वरुन ऑनलाईन पध्दतीने सादर करण्याच्या तारखा तसेच माध्यमिक शाळांनी पुनर्परीक्षार्थी, नावनोंदणी प्रमाणपत्र (Enrollment Certificate) प्राप्त झालेले खाजगी विद्यार्थी (Private Candidate), श्रेणीसुधार व तुरळक विषय घेऊन परीक्षेस प्रविष्ठ होणारे विद्यार्थी, ITI (औद्योगिक प्रशिक्षण संस्थेद्वारे Transfer Of Credit घेणारे विद्यार्थी) विद्यार्थ्यांचे आवेदनपत्रे प्रचलित पध्दतीने ऑनलाईन सादर करण्याची मुदत नियमित शुल्कासह दि. 21 नोव्हेंबर ते 30 नोव्हेंबर 2023 तर विलंब शुल्कासह दि. 1 डिसेंबर ते 8 डिसेंबर 2023 पर्यंत राहील. माध्यमिक शाळांनी चलन Download करुन शुल्क भरण्याच्या तारीख दि. 23 नोव्हेंबर ते 11 डिसेंबर 2023 राहील, असे अमरावती विभागीय शिक्षण मंडळाचे विभागीय सहाय्यक सचिव संगीता पवार यांनी प्रसिध्दी पत्रकाव्दारे कळविले आहे.

 

00000

 

न्युक्लिअस बजेट योजनेंतर्गत अनुदान योजनांसाठी आदिवासी लाभार्थ्यांकडून अर्ज आमंत्रित

 

न्युक्लिअस बजेट योजनेंतर्गत अनुदान योजनांसाठी

आदिवासी लाभार्थ्यांकडून अर्ज आमंत्रित

 

·       15 डिसेंबर अंतीम मुदत

 

अमरावती, दि. 20:  एकात्मिक आदिवासी विकास प्रकल्प कार्यालय, धारणी कार्यक्षेत्रातील  केंद्रवर्ती अर्थसंकल्प योजना सन 2023-24 अंतर्गत मंजूर विविध योजनाचा लाभ घेण्याकरीता अनूसूचित जमातीच्या लाभार्थ्यांकडून अर्ज मागविण्यात आले आहे. इच्छुक लाभार्थ्यांनी दि. 15 डिसेंबरपर्यंत अर्ज सादर करावे, असे आवाहन एकात्मिक आदिवासी विकास प्रकल्प धारणीचे सहायक जिल्हाधिकारी तथा प्रकल्प अधिकारी रिचर्ड यानथन यांनी केले आहे.

 

            आदिवासी शेतकरी लाभार्थ्यांना तुषार सिंचन 85 टक्के अनुदानावर पुरवठा करणे, आदिवासी शेतकरी लाभार्थ्यांना 85 टक्के अनुदानावर काटेरीतार लोखंडी ऐंगलसह खरेदी करण्यासाठी अर्थ सहाय्य, आदिवासी वनपट्टे धारकांना शेती अवजारे खरेदी करीता 85 टक्के अनुदानावर अर्थसहाय्य, आदिवासी वनपट्टे धारकांना शेळी गट खरेदीकरीता 85 टक्के अनुदानावर अर्थसहाय, आदिवासी बांधवांना कुकूटपालनाकरीता 85 टक्के अनुदानावर अर्थसहाय्य व आदिवासी युवतींना 85 टक्के अनुदानावर शिलाई मशिन खरेदीकरीता अर्थसहाय्य करणे. 

 

धारणी, चिखलदरा, अंजनगाव व अचलपूर तालुक्यातील  लाभार्थ्यांनी प्रकल्प अधिकारी एकात्मिक आदिवासी विकास प्रकल्प कार्यालय, धारणी जि. अमरावती या ठिकाणी व नांदगाव खंडेश्वर, भातकुली, अमरावती, चांदुर रेल्वे, धामणगाव रेल्वे व दर्यापूर तालुक्यातील लाभार्थ्यांनी अपर आयुक्त आदिवासी विकास अमरावती येथे तसेच मोर्शी, वरूड तिवसा व चांदुर बाजार तालुक्यातील लाभार्थ्यांनी प्रकल्प अधिकारी एकात्मिक आदिवासी विकास प्रकल्प धारणी अंतर्गत उपकार्यालय मोर्शी येथे अर्ज उपलब्ध असून अधिक माहितीसाठी या कार्यालयातील विकास शाखेशी संपर्क साधावा. तसेच अधिक माहितीसाठी दुरध्वनी क्र. 07226-224217 वर संपर्क साधावा. प्राप्त झालेल्या अर्जाच्या जेष्ठतेनुसार संगणीकृत यादी तयार करण्यात येईल. त्यानंतर कागदपत्रे तपासणी करून पात्र, अपात्र अर्जदाराच्या स्वतंत्र याद्या तयार करण्यात येईल. लाभार्थी निवड करतांना प्रथम दारीद्रय रेषे खालील लाभार्थी, अपंग, विधवा, परितक्त्य, निराधार महिला यांना प्राधान्याने योजनेचा लाभ देण्यात येईल. तरी पात्र अनुसूचित जमातीच्या लाभार्थ्यांनी विहित मुदतीत अर्ज सादर करावा, असे आवाहन करण्यात आले आहे.

00000

आदिवासी विद्यार्थ्यांच्या वसतीगृहाकरीता भाडेतत्वावर इमारतीसाठी प्रस्ताव आमंत्रित

 

आदिवासी विद्यार्थ्यांच्या वसतीगृहाकरीता

भाडेतत्वावर इमारतीसाठी प्रस्ताव आमंत्रित 

अमरावती, दि.20 : प्रकल्प कार्यालय, एकात्मिक आदिवासी विकास प्रकल्प, धारणी अंतर्गत आदिवासी मुलांचे वसतीगृह क्र. एक करीता 100 विद्यार्थी क्षमतेची इमारत भाडेतत्वावर आवश्यक आहे. इच्छुकांनी इमारत भाडे प्रस्ताव प्रकल्प कार्यालय, धारणी येथे सादर करण्याचे आवाहन विभागाव्दारे करण्यात आले आहे. अधिक माहितीसाठी poitdp.dharni-mh@gov.in व podharni@gmail.com या संकेतस्थळावर संपर्क साधावा, असेही विभागाव्दारे कळविण्यात आले आहे. भाडेतत्वावर इमारतीचा प्रस्ताव पंधरा दिवसात प्रकल्प कार्यालयाला सादर करण्यात यावेत.

           भाडेतत्वावरील वसतीगृह इमारत ही भौतीक सोयी-सुविधा व विद्यार्थ्यांच्या सुरक्षिततेच्या दृष्टीने परिपूर्ण असणे अनिवार्य आहे.

00000

माजी प्रधानमंत्री इंदिरा गांधी यांना जयंतीनिमित्त अभिवादन एकात्मता दिनाची दिली प्रतिज्ञा

 

माजी प्रधानमंत्री इंदिरा गांधी यांना जयंतीनिमित्त अभिवादन

एकात्मता दिनाची दिली प्रतिज्ञा

 

      अमरावती, दि. 19 : भारताच्या पहिल्या महिला प्रधानमंत्री इंदिरा गांधी यांच्या जयंतीनिमित्त विभागीय आयुक्त कार्यालयात आज विभागीय आयुक्त डॉ. निधी पांण्डेय यांनी इंदिरा गांधी यांच्या प्रतिमेला पुष्पहार अर्पण करून अभिवादन केले.

उपायुक्त गजेंद्र बावणे, तहसीलदार संतोष काकडे, राम लंके, सहाय्यक आयुक्त  वैशाली पाथरे यांच्यासह अन्य अधिकारी-कर्मचारी आदी उपस्थितांनीही स्व. इंदिरा गांधी यांच्या प्रतिमेला पुष्प अर्पण करून अभिवादन केले.

इंदिरा गांधी यांचा जन्मदिवस राष्ट्रीय एकात्मता दिन म्हणून साजरा करण्यात येतो. यानिमित्त श्रीमती पांण्डेय यांनी उपस्थित सर्वांना राष्ट्रीय एकात्मता दिनाची प्रतिज्ञा दिली.

 

०००००

आदिवासी विद्यार्थ्यांच्या वसतीगृहाकरीता भाडेतत्वावर इमारतीसाठी प्रस्ताव आमंत्रित

 आदिवासी विद्यार्थ्यांच्या वसतीगृहाकरीता

भाडेतत्वावर इमारतीसाठी प्रस्ताव आमंत्रित

अमरावती, दि.10 : प्रकल्प कार्यालय, एकात्मिक आदिवासी विकास प्रकल्प, धारणी अंतर्गत आदिवासी मुलांचे वसतीगृह क्र. 01 करीता 100 विद्यार्थी क्षमतेची इमारत भाडेतत्वावर आवश्यक आहे. इच्छुकांनी इमारत भाडे प्रस्ताव प्रकल्प कार्यालय, धारणी येथे सादर करण्याचे आवाहन विभागाव्दारे करण्यात आले आहे. अधिक माहितीसाठी poitdp.dharni-mh@gov.in व podharni@gmail.com या संकेतस्थळावर संपर्क साधावा.

           भाडेतत्वावरील वसतीगृह इमारत ही भौतीक सोयी-सुविधा व विद्यार्थ्यांच्या सुरक्षिततेच्या दृष्टीने परिपूर्ण असणे अनिवार्य आहे.

00000

एकलव्य रेसिडेंशियल पब्लिक स्कूलमध्ये प्रवेशासाठी स्पर्धा परीक्षा

 एकलव्य रेसिडेंशियल पब्लिक

स्कूलमध्ये प्रवेशासाठी स्पर्धा परीक्षा

 

अमरावती दि. 10 : आदिवासी विकास विभागांतर्गत कार्यान्वित असलेल्या एकलव्य निवासी शाळांमध्ये शैक्षणिक वर्ष 204-25 साठी इयत्ता सहावी व नववी वर्गात विद्यार्थ्यांचा अनुशेष भरुन काढण्यासाठी स्पर्धा परीक्षेचे दि. 25 फेब्रुवारी 2024 आयोजन करण्यात आले आहे.

इंग्रजी माध्यमाचा एकलव्य रेसिडेंशियल पब्लिक स्कूलमध्ये प्रवेशासाठी होणाऱ्या स्पर्धा परीक्षेकरीता आदिवासी विकास विभाग अधिनस्त असलेल्या एकात्मिक आदिवासी विकास प्रकल्प, धारणी, पांढरकवडा, किनवट, अकोला, औरंगाबाद, पुसद, कळमनुरी यांच्या कार्यक्षेत्रात असलेल्या 12 जिल्ह्यातील सर्वशासकीय व अनुदानित आश्रमशाळा जिल्हा परिषद नगरपालिका व महानंगरपालिकेच्या प्राथमिक व माध्यमिक शाळा तसेच सर्व शासन मान्य अनुदानित प्राथमिक व माध्यमिक शाळेतील सन 2023-24 या शैक्षणिक वर्षात इयत्ता 5 , 6, 7, 8 वी मध्ये शिकत असलेल्या अनुसूचित, आदिम जमातीचे विद्यार्थी सदर स्पर्धा परिक्षेसाठी पात्र राहतील.

                वरील सर्व शाळेतील मुख्याध्यापकांनी प्रवेश परिक्षेचे आवेदन पत्र विद्यार्थ्यांकडून भरुन घेवून, प्रकल्प अधिकारी, एकात्मिक आदिवासी विकास प्रकल्प कार्यालयाकडे सादर करावेत. विहीत नमुन्यातील अर्ज संबंधित शासकीय आश्रमशाळेतील मुख्याध्यापक किंवा प्रकल्प अधिकरी, एकात्मिक आदिवासी विकास प्रकल्प यांचेकडे विनामूल्य उपलब्ध आहेत. सदर अर्ज दि. 17 फेब्रुवारी 2024 पर्यंत संबंधित प्रकल्प कार्यालयाकडे मुख्याध्यापकांमार्फत सादर करावे, असे अमरावती आदिवासी विकास विभागाचे अपर आयुक्त सुरेश वानखेडे यांनी प्रसिध्दी पत्रकाव्दारे केले आहे.

0000

विभागीय लोकशाही दिनात 21 प्रकरणांवर सुनावणी, प्रलंबित प्रकरणांचा तात्काळ निपटारा करा -प्र. विभागीय आयुक्त संजय पवार

 

विभागीय लोकशाही दिनात 21 प्रकरणांवर सुनावणी

प्रलंबित प्रकरणांचा तात्काळ निपटारा करा

                      -प्र. विभागीय आयुक्त संजय पवार

अमरावती, दि. 16 : नागरिकांकडून प्राप्त अर्जावर विहित कालमर्यादेत कार्यवाही होणे आवश्यक आहे. प्रलंबित प्रकरणांचा निपटारा तात्काळ करण्यासह केलेल्या कार्यवाहीबाबत संबंधित तक्रारदारांना कळविण्यात यावे, असे निर्देश प्रभारी विभागीय आयुक्त संजय पवार यांनी आज दिले. लोकशाही दिनात एकूण 21 प्रकरणांवर चर्चा करुन त्यानुषंगाने आवश्यक कार्यवाही करण्याच्या सूचनाही त्यांनी संबंधित विभागाला दिल्या.  

विभागीय आयुक्तालयाच्या सभागृहात आज विभागीय आयुक्तांच्या अध्यक्षतेखाली लोकशाही दिन सपन्न झाला. त्यावेळी ते बोलत होते. अपर पोलीस अधिक्षक शशिकांत सातव यांच्यासह कृषी, महापालिका, जिल्हा प्रशासन, ऊर्जा विभागाचे अधिकारी यावेळी उपस्थित होते. सामान्य प्रशासन विभागाव्दारे सादर करण्यात आलेल्या 9  स्वीकृत अर्ज व 12 अस्वीकृत अर्ज अशा एकूण 21 अर्जावर चर्चा आजच्या विभागीय लोकशाही दिनात झाली. यावेळी उपस्थित तक्रारदारांचे म्हणने ऐकूण घेण्यात आले. प्रलंबित प्रकरणांचा तात्काळ निपटारा करण्यासाठी आवश्यक कार्यवाही करण्याचे निर्देश विभागीय आयुक्तांनी संबंधित विभागांना दिले.  

00000

विभागीय आयुक्तालयात गुरुवारी (ता.16 नोव्हेंबर) लोकशाही दिन

 विभागीय आयुक्तालयात गुरुवारी (ता.16 नोव्हेंबर) लोकशाही दिन

अमरावती, दि. 06 :  विभागीय लोकशाही दिन नोव्हेंबर महिन्याच्या दुस-या सोमवारी आयोजित करण्यात येतो. परंतु, विभागीय आयुक्त यांच्या आदेशान्वये संपूर्ण अमरावती जिल्ह्यात सोमवारी, दि. 13 नोव्हेंबरला स्थानिक सुट्टी जाहीर केली आहे. त्यामुळे सदरचा विभागीय लोकशाही दिन पुढील कामकाजाच्या दिवशी म्हणजे गुरुवारी (दि. 16 नोव्हेंबर)  सकाळी 11 वाजता विभागीय आयुक्त कार्यालयात होईल.

विभागीय लोकशाही दिनासाठी यापूर्वी प्राप्त तक्रारींचे निराकरण करण्यात येईल. विभागीय लोकशाही दिनात तक्रार नोंदविण्यासाठी नागरिकांनी तसेच महिलांनी आपले अर्ज (तालुका, जिल्हा किंवा महापालिका लोकशाही दिनानंतर) विहित नमुन्यात 15 दिवस अगोदर दोन प्रतीत पाठविणे आवश्यक राहील. नागरिकांनी तक्रार अर्ज dcgamravati@gmail.com किंवा dcg_amravati@rediffmail.com या ई-मेलवर विहित नमुन्यात पाठविण्याचे आवाहन आयुक्तालयाच्यावतीने करण्यात आले आहे.  

००००००

छत्रपती शिवाजी महाराज कृषि योजनेंतर्गत मागेल त्याला शेततळे शेतकऱ्यांनी लाभ घेण्याचे कृषी विभागाचे आवाहन

 छत्रपती शिवाजी महाराज कृषि योजनेंतर्गत मागेल त्याला शेततळे

शेतकऱ्यांनी लाभ घेण्याचे कृषी विभागाचे आवाहन

 

            अमरावती, दि.2 : शेतकऱ्यांना आवश्यक असणारी बाब त्याला मागणी केल्यावर तातडीने उपलब्ध करुन दिल्यास त्याचा शेतकऱ्यास मोठ्या प्रमाणावर फायदा होऊ शकतो. त्यामुळे छत्रपती शिवाजी महाराज कृषि योजना (मुख्यमंत्री शाश्वत कृषि सिंचन योजने अंतर्गत मागेल त्याला शेततळे) वैयक्तिक शेततळे ही योजना सुरु करण्यात आलेली आहे.

योजनेमध्ये सहभागी होण्याकरीता अर्जदार शेतकऱ्याकडे स्वत:च्या नावावर किमान ०.४० हेक्टर क्षेत्र असणे आवश्यक आहे व जमीन शेततळे खोदण्यास तांत्रिकदृष्ट्या योग्य असावी. शेतकऱ्यांनी महा- डीबीटी पोर्टलचे http://mahadbt.maharashtra.gov.in/Farmar/Login/Login या संकेतस्थळावर अर्ज सादर करावा. अर्ज सादर करतेवेळी जमिनीचा ७/१२, ८अ उतारा, आधारकार्ड झेरॉक्स, बँक पासबूक झेरॉक्स, हमीपत्र, जातीचा दाखला इत्यादी कागदपत्रे आवश्यक आहे. महा-डीबीटी पोर्टल वरील सांगणकीय प्रणालीद्वारे अर्ज करणाऱ्या पात्र शेतकऱ्यांना लाभ देण्यात येईल. या योजनेत किमान १५×१५×३ ते ३४×३४×३ मीटर आकारमानाचे शेततळे घेता येईल व अश्या वेगवेगळ्या प्रकारच्या शेततळ्याकरिता किमान रु. १४४३३/- ते रु. ७५०००/- अनुदान अनुज्ञेय आहे.

अमरावती विभागातील बहुतांश शेती ही कोरडवाहू असून ती सर्वस्वी पावसावर अवलंबून आहे. पावसाचे होणारे असमान वितरण आणि पावसामध्ये येणारे खंड या प्रमुख अडचणी आहेत. अशा कालावधीत सिंचन सुविधेअभावी पिकाच्या उत्पादनात मोठ्या प्रमाणात घट येते अथवा पाण्याचा खूप जास्त ताण पडल्यास पिके देखिल नष्ट होतात व पर्यायाने शेतकऱ्यास आर्थिक नुकसानीला सामोरे जावे लागते. या वर्षीचा कमी पाऊसमानाच्या परिस्थितीत शेततळे खोदुन या योजनेचा लाभ घेण्याबाबत कृषी विभागाव्दारे आवाहन करण्यात आले आहे. या योजनेचा विभागातील अधिकाधिक शेतकऱ्यांनी लाभ घ्यावा, असे आवाहन विभागीय कृषि सहसंचालक किसन मुळे यांनी एका प्रसिध्दी पत्रकाद्वारे केले आहे.

 

0000

इयत्ता दहावी व बारावी परीक्षेचे अंतिम वेळापत्रक जाहीर

 इयत्ता दहावी व बारावी परीक्षेचे अंतिम वेळापत्रक जाहीर

            अमरावती, दि.2 : फेब्रुवारी-मार्च 2024 मध्ये महाराष्ट्र राज्य माध्यमिक व उच्च माध्यमिक शिक्षण मंडळाच्या पुणे, नागपूर, छत्रपती संभाजीनगर, मुंबई, कोल्हापूर, अमरावती, नाशिक, लातूर व कोकण या नऊ विभागीय मंडळामार्फत घेण्यात येणाऱ्या माध्यमिक शालान्त प्रमाणपत्र (इ. दहावी) व उच्च माध्यमिक प्रमाणपत्र (इ. बारावी) परीक्षांचे लेखी परीक्षेचे वेळापत्रक मंडळाव्दारे जाहीर करण्यात आले आहे. तपशील पुढीलप्रमाणे आहे.

उच्च माध्यमिक प्रमाणपत्र परीक्षा (इ. बारावी) सर्वसाधारण व व्दिलक्षी अभ्यासक्रमांची व व्यवसाय अभ्यासक्रमांची परीक्षा बुधवार, दि. 21 फेब्रुवारी ते मंगळवार, दि. 19 मार्च, 2024 दरम्यान होणार आहे. इयत्ता बारावी, माहिती तंत्रज्ञान व सामान्य ज्ञान विषयांची ऑनलाईन परीक्षा बुधवार दि. 20 मार्च  ते शनिवार दि. 23 मार्च, 2024 दरम्यान होणार आहे. माध्यमिक शालान्त प्रमाणपत्र परीक्षा (इ. दहावी) ही शुक्रवार, दि. 1 मार्च, ते मंगळवार दि. 26 मार्च, 2024 दरम्यान होणार आहे.

इ. दहावीची प्रात्यक्षिक, श्रेणी, तोंडी व अंतर्गत मूल्यमापन परीक्षा शनिवार दि. 10 फेब्रुवारी ते गुरूवार दि. 29 फेब्रुवारी, 2024 होणार आहे. तसेच इ. बारावीची प्रात्यक्षिक, श्रेणी, तोंडी व अंतर्गत मूल्यमापन परीक्षा शुक्रवार दि. 2 फेब्रुवारी ते मंगळवार दि. 20 फेब्रुवारी, 2024 या कालावधीत आयोजित करण्यात येणार आहे.

उपरोक्त कालावधीमध्ये आयोजित केलेले दिनांकनिहाय सविस्तर वेळापत्रक मंडळाच्या अधिकृत www.mahahsscboard.in संकेतस्थळावर दि. 2 नोव्हेंबर 2023 पासून उपलब्ध करून देण्यात येत आहे. मंडळाच्या संकेतस्थळावरील वेळापत्रकांची सुविधा ही फक्त माहितीसाठी आहे. परीक्षेपूर्वी माध्यमिक शाळा/ उच्च माध्यमिक शाळा/कनिष्ठ महाविद्यालय यांचेकडे छापील स्वरूपात देण्यात येणारे वेळापत्रक अंतिम असेल. त्या छापील वेळापत्रकावरून परीक्षेच्या तारखांची खात्री करून घ्यावी व विद्यार्थ्यांनी परीक्षेस प्रविष्ठ व्हावे. अन्य संकेतस्थळावरील किंवा अन्य यंत्रणेने छपाई केलेले तसेच व्हॉट्सअॅप किंवा तत्सम माध्यमातून प्रसिध्द झालेले वेळापत्रक ग्राह्य धरू नये. उपरोक्त बाबत सर्व संबंधितांनी नोंद घ्यावी, असे पुणे राज्य मंडळाच्या सचिव अनुराधा ओक यांनी प्रसिध्दी पत्रकाद्वारे कळविले आहे.

00000