चिखलदरा पर्यटन महोत्सवाची जबाबदारी ‘एमटीडीसी’कडे
महोत्सवाच्या
यशस्वितेसाठी समन्वयाने व पारदर्शकपणे काम करावे
-पालकमंत्री प्रविण पोटे-पाटील
अमरावती, दि. 12 : जिल्ह्यात पर्यटनाला चालना देण्याच्या दृष्टीने चिखलदरा
महोत्सव महत्वपूर्ण असून, त्याच्या यशस्वितेसाठी समन्वयाने व पारदर्शकपणे काम
करण्याचे निर्देश पालकमंत्री प्रविण पोटे-पाटील यांनी आज येथे दिले.
महोत्सवाबाबत आढावा बैठक पालकमंत्र्यांच्या अध्यक्षतेखाली जिल्हाधिकारी
कार्यालयाच्या सभागृहात झाली. त्यावेळी ते बोलत होते. चिखलदऱ्याच्या नगराध्यक्ष
विजया सोमवंशी, मुख्य कार्यकारी अधिकारी मनीषा खत्री, निवासी उपजिल्हाधिकारी नितीन
व्यवहारे, पर्यटन महामंडळाचे प्रादेशिक व्यवस्थापक श्री. सवई यांच्यासह जिल्हा
परिषद, गृह, पर्यटन, वन, सार्वजनिक बांधकाम आदी विभागांचे अधिकारी व चिखलदरा न. प.
सदस्य उपस्थित होते.
श्री. पोटे म्हणाले की, येत्या 23,24 व 25 फेब्रुवारी रोजी
चिखलदरा महोत्सव जिल्ह्यात साजरा करण्या येणार आहे. महोत्सवाची जबाबदारी यंदा
महाराष्ट्र पर्यटन विकास महामंडळाकडे सोपविण्यात आली आहे. त्यांच्यासह चिखलदरा नगरपरिषद,
जिल्हा नियोजन अधिकारी व इतर यंत्रणांनी महोत्सवाच्या यशस्वितेसाठी समन्वयपूर्वक
नियोजन करावे. पर्यटन महामंडळाच्या प्रादेशिक व्यवस्थापकांनी अंदाजपत्रक सादर
करावे. विविध कामांसाठी ई-निविदा प्रक्रिया राबवावी व स्थानिक, तसेच बाहेरील
कंत्राटदारांसाठी प्रक्रिया खुली असावी. निविदा प्रक्रिया संबंधित सर्व आर्थिक
कामे पारदर्शकपणे करावीत. महोत्सवात स्थानिक आदिवासी बांधवांच्या कलाकृतींचा
समावेश असावा, असेही निर्देश त्यांनी दिले.
महोत्सवाच्या यशस्वीतेसाठी चिखलदरा महोत्सव समिती,
कार्यक्रम संनियत्रण व नियोजन समिती अशा दोन समित्या स्थापन करण्यात आल्या आहेत. 5
व 7 फेब्रुवारी रोजी जिल्हाधिकारी यांच्या अध्यक्षतेखाली मुख्य कार्यक्रम व इतर
कार्यक्रम व कामांच्या नियोजनासंदर्भात बैठकी झाल्या आहेत. महोत्सवाचे कामे
गुणवत्ता व उत्तम दर्जाच्या होण्याच्या दृष्टीने पर्यटन महामंडळाच्या पॅनलवर
असणाऱ्या एजन्सीची निवड करण्यासाठी ई-निविदा प्रक्रिया राबविण्यात आली आहे. तसेच
महोत्सवाच्या आयोजनाकरिता महामंडळाला, चिखलदरा सिडको प्रशासन व नियोजन विभागांना
निधी मिळणेबाबतचे पत्र पाठविण्यात आले आहे. पर्यटकांच्या निवासाच्या व्यवस्थेकरीता
हॉटेल्स मालकांना पत्र पाठविण्यात आले आहे, अशी माहिती व्यवस्थापक श्री. सवई यांनी
दिली.
चिखलदरा नगरपालिकेकडून निधीची
मागणी करण्यात आली आहे. त्यावर कार्यवाही केली जाईल. जिल्हा माहिती
कार्यालयाने महोत्सवाच्या प्रसिद्धीची जबाबदारी पाडावी, तसेच विविध विभागांच्या
संकेतस्थळांवरही माहिती प्रसारित करावी, असेही निर्देश त्यांनी दिले. महोत्सवात
लोकनृत्य स्पर्धा, सांस्कृतिक कार्यक्रम, कवीसंमेलन, साहसी खेळ, नाईट ट्रेकिंग
यांच्यासह पतंग महोत्सवाचे आयोजन करण्याचे व महोत्सवादरम्यान रात्री उशिरापर्यंत
बस सुरु ठेवण्याचे एस. टी. महामंडळाला कळविण्याचे यावेळी ठरले. बैठकीला चिखलदरा
येथील व्यावसायिक संघटना व स्वयंसेवी संस्थांचे प्रतिनिधीही उपस्थित होते.
कोणत्याही टिप्पण्‍या नाहीत:
टिप्पणी पोस्ट करा