महाटिईटी 2025 चा अंतरिम निकाल जाहिर • निकाल http://mahatet.in या संकेतस्थळावर उपलब्ध

अमरावती दि. 20 : महाराष्ट्र शिक्षक पात्रता परीक्षा (MAHATET-2025) या परीक्षेतील पेपर क्रमांक एक व पेपर क्र. दोन चा अंतरिम निकाल महाराष्ट्र राज्य परीक्षा परिषदेच्या http://mahatet.in या संकेतस्थळावर उमेदवार परीक्षार्थी च्या लॉगिन मध्ये ऑनलाईन पद्धतीने उपलब्ध करून देण्यात आला आहे. संबंधित विद्यार्थ्यांनी याची नोंद घ्यावी, असे परिषदेच्या आयुक्त अनुराधा ओक यांनी प्रसिद्धी पत्राद्वारे कळविले आहे. महाराष्ट्र शिक्षक पात्रता परीक्षा (टीईटी) 2025 परीक्षेचे आयोजन रविवार दि. 23 नोव्हेंबर 2025 रोजी करण्यात आले होते. महाराष्ट्र शिक्षक पात्रता परीक्षा (MAHATET-2025) पेपर क्रमांक 1 व पेपर क्र. 2 ची अंतिम उत्तरसूची महाराष्ट्र राज्य परीक्षा परिषदेच्या http://mahatet.in या अधिकृत संकेतस्थळावर 12 जानेवारी 2026 रोजी प्रसिद्ध करण्यात आली आहे. पेपर क्रमांक एक व पेपर क्र. दोन साठी प्रविष्ट झालेल्या परीक्षार्थींना अंतरिम निकाल दि. 16 जानेवारी रोजी http://mahatet.in या संकेतस्थळावर उमेदवार/ परीक्षार्थ्यांचा लॉगिनमध्ये ऑनलाईन पद्धतीने पाहता येईल. अंतरिम निकालाच्या अनुषंगाने गुणपडताळणी करावयाची असल्यास अथवा त्रुटी/आक्षेप http://mahatet.in या संकेतस्थळावर 21 जानेवारी, सायंकाळी 6 वाजेपर्यंत उमेदवार/परीक्षार्थींना लॉगिन मधून ऑनलाईन पद्धतीने आक्षेप नोंदविता येईल. अन्य मार्गाने आलेल्या अर्जाचा विचार केला जाणार नाही. याची संबंधित सर्व उमेदवार परीक्षार्थींनी नोंद घ्यावी, असे आवाहन महाराष्ट्र राज्य परीक्षा परिषदे मार्फत करण्यात आले आहे.