राजर्शी छत्रपती शाहू महाराज शिक्षण शुल्क शिष्यवृत्ती योजनेअंतर्गत

विद्यार्थ्यांसाठी नविन अभ्यासक्रमांचा समावेश

            

अमरावती, दि. 10 :  राजर्शी राहू महाराज शिक्षण शुल्क शिष्यवृत्ती योजनेअंतर्गत आर्थिकदृष्ट्या दुर्बल घटकातील पात्र विद्यार्थ्यासाठी लाभाची व्याप्ती वाढविली असून काही नवीन अभ्यासक्रमाचा समावेश करण्यात आला आहे.

शासकीय/अशासकीय अनुदानित अंशत: अनुदानित (टप्पा अनुदानित-विनाअनुदानित) महाविद्यालये व अकृषी विद्यापीठे व त्या विद्यापीठातील अभ्यासक्रमाकरिता (खाजगी अभिमत विद्यापीठे/स्वयंअर्थसहायित खाजगी विद्यापीठे वगळून) शिष्यवृत्ती योजना लागू करण्यात आली आहे.

शैक्षणिक वर्ष 2018-19 पासून मान्यताप्राप्त व्यवसायिक व बिगर व्यावसायीक अभ्यासक्रमांमध्ये शिकणाऱ्या आर्थिकदृष्ट्या दुर्बल घटकांतील विद्यार्थ्यांना राजशी छत्रपती शाहू महाराज शिक्षण शुल्क शिष्यवृत्तीसाठी पालकांचे उत्पन्न मर्यादा 6 लाखावरुन 8 लक्ष रुपये करण्यात आली आहे.

यानुसार व्यवसायीक अभ्यासक्रम-शासन नियमानुसार आकारण्यात येणाऱ्या परीक्षा शुल्काच्या 50 टक्के, बिगर व्यवसायीक अभ्यासक्रम-शासन नियमानुसार आकारण्यात येणाऱ्या परीक्षा शुल्काच्या 100 टक्के, त्याचप्रमाणे ज्या विद्यार्थ्यांचे पालक अल्पभूधारक/नोंदणीकृत मंजूर नाहीत परंतु ज्या विद्यार्थ्यांचे कुटुंबाचे वार्षिक उत्पन्न 1 लक्ष रुपये किंवा त्यापेक्षा कमी आहे अशा विद्यार्थ्यांना डॉ. पंजाबराव देशमुख वसतीगृह निर्वाह भत्ता योजनेअंतर्गत खालील प्रमाणे निर्वाह भत्ता अनुज्ञेय आहे.

योजनेस पात्र असलेल्या विद्यार्थ्यांकडून शिक्षण शुल्काची रक्कम महाविद्यालयाने प्रवेशाच्या वेळी आगाऊ स्वरुपात घेऊ नये व या बाबतील संबंधीत शिष्यवृत्तीस पात्र विद्यार्थ्यांची पिळवणूक होणार नाही याची संबंधीत महाविद्यालय/संस्था खात्री करेल तसेच संबंधीत पात्र विद्यार्थ्यांस डी. बी. टी. द्वारे अनुज्ञेय शिष्यवृत्तीची रक्कम प्राप्त होताच संबंधित विद्यार्थ्यांने शिक्षण शुलकाची रक्कम तात्काळ महाविद्यालयास अदा करावी याची सर्वस्वी जबाबदारी विद्यार्थ्यांवर राहिल.

तसेच शासकीय महाविद्यालय व अशासकीय अनुदानित महाविद्यालयामध्ये व्यावसायीक अभ्यासक्रमास प्रवेश घेतलेल्या ज्या विद्यार्थ्यांच्या पालकांचे उत्पन्न 2 लक्ष 50 हजार रुपये किंवा त्यापेक्षा कमी आहे. अशा योजनेस पात्र विद्यार्थ्यांना 100 टक्के शिक्षण शुल्क प्रतिपूर्ती अनुज्ञेय आहे.

बिगर व्यावयायिक अभ्यासक्रमाकरीता प्रवेश घेतलेल्या पात्र विद्यार्थ्यांना 100 टक्के शिक्षण शुल्क प्रतिपूर्ती अनुज्ञेय आहे तरी अशा सदरील योजनेस पात्र विद्यार्थ्यांनी प्रवेशाच्या वेळी शिक्षण शुल्क भरण्याचा आग्रह महाविद्यालयाने धरु नये.

तरी सर्व शैक्षणिक संस्थांनी आपल्या संस्थेतील सदरील योजनेस पात्र विद्यार्थी शिष्यवृत्तीच्या लाभापासून वंचित राहणार नाहीत याची काळजी घ्यावी. तसेच सदरील योजना सन 2018-19 या वर्षामध्ये MAHADBT-Portal द्वारे राबविण्यात येणार असल्याची सर्व विद्यार्थ्यांना माहिती द्यावी, असे सहसंचालक उच्च शिक्षण यांनी कळवीले आहे.

00000000