महाराष्ट्र लोकसेवा हक्क अधिनियम 2015
नागरिकांना अधिसूचित सेवा तत्परतेने प्रदान करा
-राज्य लोकसेवा हक्क आयोगाचे निर्देश
अमरावती, दि. 12 : महाराष्ट्र लोकसेवा हक्क अधिनियमातील तरतूदीनुसार विभागांतर्गत येणाऱ्या अधिसूचित सेवा नागरिकांना तत्परतेने पुरावाव्यात, असे निर्देश अमरावती विभागाच्या राज्य लोकसेवा हक्क आयोगाकडून देण्यात आले. अधिसूचित सेवा संदर्भात काही तांत्रिक अडचण किंवा समस्या असल्यास आयोगाला अवगत करण्यात यावे, अशा सूचनाही देण्यात आल्या. यांसदर्भात नुकतीच उपविभागीय अधिकारी कार्यालयात बैठक घेण्यात आली.
अमरावती राज्य लोकसेवा हक्क आयोगाचे उपसचिव अनिल खंडागळे, कक्ष अधिकारी देवेन्द्र चव्हाण, उपविभागीय अधिकारी रिचर्ड यानथन यांचेसह अमरावती उपविभागातील सर्व शासकीय विभागाचे अधिकारी उपस्थित होते.
महाराष्ट्र लोकसेवा हक्क अधिनियम 2015 च्या प्रभावी अंमलबजावणीसाठी अमरावती जिल्ह्यामध्ये उपविभागनिहाय बैठका आयोजित करून अधिनियमाबाबत माहिती व आढावा घेण्यासाठी अमरावती विभाग राज्य लोकसेवा हक्क आयोगामार्फत कालबध्द कार्यक्रम आखलेला आहे. त्याअनुषंगाने 11 मे रोजी अमरावती विभागातील प्रशासकीय अधिकाऱ्यांची बैठक सपन्न झाली. बैठकीत महाराष्ट्र लोकसेवा हक्क अधिनियम 2015 च्या अधिनियमातील तरतूदीबाबत तसेच अधिसूचित सेवा याबाबत मार्गदर्शन करण्यात आले.
अधिसूचित सेवा प्रदान करताना उदभवणा-या तांत्रिक व प्रशासकीय अडचणी बाबत चर्चा करून आवश्यक सूचना देण्यात आल्या. सदर सेवा प्रदान करण्यास काही तांत्रिक अडचणी अथवा समस्या असल्यास त्याबाबत आयोगास अवगत करावे. सदर अधिनियमातील तरतुदीनुसार अधिसूचित सेवा विहित कालावधीत पात्र व्यक्तींना प्रदान करण्याच्या अनुषंगाने सर्व संबंधितानी कार्यवाही करावी. जास्तीत जास्त सेवा उपलब्ध करून देणे अथवा सेवा अधिसूचित करण्याबाबत शिफारसी करण्याबाबतचे निर्देश यावेळी देण्यात आले.
अधिनियमांतर्गत प्रथम अपिल व व्दितीय अपिलांवर विहित मुदतीत कार्यवाही करून आदेश पारीत करण्याचे निर्देश देण्यात आले. अधिसूचित सेवा प्रदान करण्याबाबतचा तपशिल तसेच पदनिर्देशित अधिकारी, प्रथम अपिलीय अधिकारी, व्दितीय अपिलीय अधिकारी यांची माहिती कार्यालयाच्या दर्शनी भागावर लावण्याच्या सूचनाही संबंधित कार्यालय प्रमुखांना देण्यात आल्या.
00000
कोणत्याही टिप्पण्या नाहीत:
टिप्पणी पोस्ट करा