राज्य शासनाच्या उत्कृष्ट पत्रकारिता पुरस्कार – 2019 साठी प्रवेशिका पाठविण्याचे आवाहन

राज्य शासनाच्या उत्कृष्ट पत्रकारिता पुरस्कार – 2019 साठी

प्रवेशिका पाठविण्याचे आवाहन

        अमरावती, दि. 15 : माहिती व जनसंपर्क महासंचालनालयामार्फत उत्कृष्ट पत्रकारिता, उत्कृष्ट लेखन, उत्कृष्ट दूरचित्रवाणी वृत्तकथा, उत्कृष्ट छायाचित्रकार, समाज माध्यम आणि स्वच्छता अभियानाबाबत केलेल्या जनजागृतीपर लेखनासाठी पुरस्कार स्पर्धा जाहीर करण्यात येत आहे. या स्पर्धेसाठी दिनांक 1 जानेवारी, 2019 ते 31 डिसेंबर, 2019 पर्यंतच्या कालावधीत प्रसिध्द झालेल्या लेखन/छायाचित्रे/वृत्तकथा यांच्या प्रवेशिका मागविण्यात येत आहेत. प्रवेशिका पाठविण्याचा अंतिम दिनांक 31 जानेवारी, 2020 असा आहे.

            राज्यातील विविध भागातील स्पर्धकांनी संबंधित जिल्हा माहिती कार्यालयाकडून तर मुंबई शहर व मुंबई उपनगर जिल्ह्यातील इच्छुकांनी, माहिती व जनसंपर्क महासंचालनालय, तळमजला, हुतात्मा राजगुरु चौक, मादाम कामा मार्ग, मंत्रालय, मुंबई-32 येथून विहित नमुन्यातील अर्ज प्राप्त करुन घ्यावयाचे आहेत. अर्जाचे नमुने dgipr.maharashtra.gov.in या संकेतस्थळावर उपलब्ध आहेत.

पुरस्कारांची माहिती

अ.क्र	पुरस्काराचे नाव		पारितोषिक
1	बाळशास्त्री जांभेकर पुरस्कार (मराठी) (राज्यस्तर)		51 हजार रुपये (मानचिन्ह व प्रशस्तीपत्र)
2	अनंत गोपाळ शेवडे पुरस्कार (इंग्रजी) (राज्यस्तर)		51 हजार रुपये (मानचिन्ह वप्रशस्तीपत्र)
3	बाबूराव विष्णू पराडकर पुरस्कार (हिंदी) (राज्यस्तर)		51 हजार रुपये (मानचिन्ह व प्रशस्तीपत्र)
4	मौलाना अबुल कलाम आझाद पुरस्कार(उर्दू) (राज्यस्तर)		51 हजार रुपये (मानचिन्ह व प्रशस्तीपत्र)
5	यशवंतराव चव्हाण पुरस्कार शासकीय गट (मराठी) (माहिती व जनसंपर्क) (राज्यस्तर)		51 हजार रुपये (मानचिन्ह व प्रशस्तीपत्र)
6	पु.ल.देशपांडे उत्कृष्ट दूरचित्रवाणी वृत्तकथा पुरस्कार(राज्यस्तर)		51 हजार रुपये (मानचिन्ह व प्रशस्तीपत्र)
7	तोलाराम कुकरेजा उत्कृष्ट वृत्तपत्र छायाचित्रकार पुरस्कार (राज्यस्तर)		51 हजार रुपये (मानचिन्ह व प्रशस्तीपत्र)
8	केकी मूस उत्कृष्ट छायाचित्रकार पुरस्कार शासकीय गट (माहिती व जनसंपर्क) (राज्यस्तर)		51 हजार रुपये (मानचिन्ह व प्रशस्तीपत्र)
9	समाज माध्यम पुरस्कार (राज्यस्तर)		51 हजार रुपये (मानचिन्ह व प्रशस्तीपत्र)
10	स्वच्छ महाराष्ट्र जनजागृती पुरस्कार (राज्यस्तर)		51 हजार रुपये (मानचिन्ह व प्रशस्तीपत्र)
11	पत्रकार सुधाकर डोअीफोडे अग्रलेखन पुरस्कार (राज्यस्तर)		51 हजार रुपये (मानचिन्ह व प्रशस्तीपत्र)
विभागीय पुरस्कार
12	दादासाहेब पोतनीस पुरस्कार, नाशिक विभाग		51 हजार रुपये (मानचिन्ह व प्रशस्तीपत्र, या व्यतिरिक्त रुपये 10 हजार दै.गावकरीने पुरस्कृत केले आहेत.)
13	अनंतराव भालेराव पुरस्कार, औरंगाबाद आणि लातूर विभाग		51 हजार रुपये (मानचिन्ह व प्रशस्तीपत्र)
14	आचार्य अत्रे पुरस्कार, मुंबई विभाग		51 हजार रुपये (मानचिन्ह व प्रशस्तीपत्र)
15	नानासाहेब परूळेकर पुरस्कार, पुणे विभाग		51 हजार रुपये (मानचिन्ह व प्रशस्तीपत्र)
16	शि.म.परांजपे पुरस्कार, कोकण विभाग		51 हजार रुपये (मानचिन्ह व प्रशस्तीपत्र)
17	ग.गो.जाधव पुरस्कार, कोल्हापूर विभाग	51 हजाररुपये (मानचिन्ह व प्रशस्तीपत्र)
18	लोकनायक बापूजी अणे पुरस्कार, अमरावती विभाग	51 हजार रुपये (मानचिन्ह व प्रशस्तीपत्र)
19	ग.त्र्यं.माडखोलकर पुरस्कार, नागपूर विभाग	51 हजार रुपये (मानचिन्ह व प्रशस्तीपत्र)

नियम व अटी

राज्य / विभागीय पुरस्कार

        पुरस्कारांसाठी पत्रकारांची मागील 5 वर्षाची कामगिरी, त्यांची सामाजिक बांधिलकी, शासनाच्या विकासविषयक प्रसिध्दीसाठी, जनतेमधील विकासविषयक जाणिवांच्या जागृतीसाठी त्यांनी केलेले प्रयत्न आणि पुरस्कार देण्यात येणाऱ्या वर्षातील त्यांची कामगिरी याचा विचार केला जाईल. मराठी, इंग्रजी, हिंदी आणि उर्दू भाषेतील राज्य/विभागीय पुरस्कारांसाठी पत्रकारांची निवड याच पध्दतीने केली जाईल. या स्पर्धेत फक्त मराठी भाषेसाठी राज्य व विभागीयस्तर आहेत. इंग्रजी, हिंदी, उर्दू या भाषेतील पुरस्कार तसेच समाज माध्यम पुरस्कार आणि स्वच्छ महाराष्ट्र जनजागृती पुरस्कार हे केवळ राज्यस्तरीय आहेत. पुरस्कारासाठी निवड झाल्यास पुरस्कार स्वीकारण्याची तयारी असल्याचे संबंधित पत्रकाराचे संमती पत्र प्रवेशिकेसोबत जोडणे आवश्यक आहे.

            उत्कृष्ट लेखन पुरस्कारासाठी पाठवावयाच्या प्रवेशिकेसोबत मूळ लेखनाचे कात्रण त्याच्या 2 प्रतीसह पाठवावे लागेल. मूळ लेखनाच्या वृत्तपत्रीय कात्रणांसोबत त्याच्या 2 प्रती नसल्यास प्रवेशिका रद्द होईल. मूळ लेखनावर लेखकाचे नाव नसल्यास ज्या नियतकालिकात हा लेख प्रसिध्द झाला असेल त्या नियतकालिकाच्या संपादकांचा दाखला जोडलेल्या प्रवेशिकांचाच विचार केला जाईल.

            पत्रकारांच्या तसेच वृत्तपत्र छायाचित्रकारांच्या गटात भाग घेणाऱ्या स्पर्धकांनी शासन अथवा शासकीय महामंडळाच्या सेवेत नसल्याचे प्रतिज्ञापत्र प्रवेशिकेसोबत जोडणे आवश्यक आहे.

            अर्जदाराने राज्य व विभागीय पताळीवरील प्रवेशिका नागपूर आणि औरंगाबाद येथील संचालक (माहिती), अमरावती, नाशिक, पुणे, कोल्हापूर, कोकण विभाग येथील विभागीय उपसंचालक (माहिती) किंवा जिल्हा माहिती अधिकारी यांच्याकडे थेट पाठवाव्यात. प्रवेशिकेसोबत जिल्हा माहिती अधिकारी किंवा पत्रकार संघटनांच्या शिफारसपत्राची आवश्यकता नाही.

मराठी, हिंदी, इंग्रजी, उर्दू या चारही भाषेतील राज्यस्तरीय पुरस्कारांसाठी तसेच राज्यपातळीवरील शासकीय गट व विभागीयपातळीवरील मराठी भाषेतील पुरस्कारपात्र विजेत्यांची निवड करण्यासाठी माहिती व जनंसपर्क महासंचालनालयातर्फे परीक्षकांची समिती नियुक्त करण्यात येईल. समितीची रचना, स्पर्धा व स्पर्धेतील पुरस्कारासंबंधी शासनाचे निर्णय अंतिम राहतील.

            ज्या नियतकालिकांचा खप व जनमानसावरील प्रभाव चांगला आहे, अशाच नियतकालिकांतील मजकूर स्पर्धेच्या प्रवेशिकेसाठी पात्र ठरेल.

            जे पत्रकार बृहन्मुंबई, नवी मुंबई(कोकण), कोल्हापूर, नागपूर, अमरावती, नाशिक, पुणे आणि औरंगाबाद या विभागात वास्तव्य करीत असतील, त्यांना त्या विभागासाठी असलेल्या विभागीय स्पर्धेतच भाग घेता येईल. मात्र त्यांचे लेखन अन्य कोणत्याही विभागातील वृत्तपत्रात प्रसिध्द झाले असेल तरी ते ग्राह्य मानण्यात येतील.

            गोवा व बेळगाव येथील पत्रकारांना कोल्हापूर विभागीय स्पर्धेत (सिंधुदुर्ग आणि सांगली जिल्ह्यांसह) सहभाग घेता येईल. दिल्ली येथील पत्रकारांनी आपल्या प्रवेशिका थेट किंवा महाराष्ट्र परिचय केंद्रामार्फत मुख्यालयात माहिती व जनसंपर्क महासंचालनालय, तळमजला, हुतात्मा राजगुरु चौक, मादाम कामा मार्ग, मंत्रालय, मुंबई-32 पाठविता येतील.

            शासकीय गटातील स्पर्धेसाठी एकच प्रवेशिका पाठविण्याची मुभा राहील. प्रवेशिका संबंधी विभागाच्या संचालक किंवा उपसंचालकांना व बृहन्मुंबईच्या प्रवेशिका माहिती व जनसंपर्क महासंचालनालयात वेगवेगळ्या पाठवाव्या लागतील.

            2019 या वर्षात दैनिक वृत्तपत्रात, नियतकालिकात प्रसिध्द झालेल्या लेखांची कात्रणे प्रवेशिकेसोबत जोडणे आवश्यक आहे.

            प्रवेशिका राज्यस्तर किंवा विभागीयस्तरासाठी आहे तसेच कोणत्या भाषेकरिता आहे याबाबतचा स्पष्ट उल्लेख असावा. स्पर्धेसाठी पाठविलेली प्रवेशिका, त्यासोबत जोडलेली लेखांची कात्रणे निटनेटकी असणे अत्यावश्यक आहे. अस्ताव्यस्त, खाडाखोड असणारी किंवा वाचता येणार नाहीत, अशी प्रवेशिका रद्द करण्यात येईल. एकाच पत्रकाराला सलग दोन वर्ष पुरस्कार प्राप्त झाला असल्यास तिसऱ्या वर्षी त्याची प्रवेशिका विचारात घेतली जाणार नाही.

            प्रत्येक गट व भाषेसाठी संबंधित पत्रकारांनी एकच प्रवेशिका पाठवावी. एकापेक्षा जास्त प्रवेशिका पाठविल्यास त्याचा विचार केला जाणार नाही.

विकास योजना संदर्भातील

समाज माध्यम (सोशल मीडिया) पुरस्कार

            ही स्पर्धा वृत्तविषयक/चालू घडामोडीविषयक संकेतस्थळे व ब्लॉग या समाज माध्यमात प्रसारित मराठी भाषेतील वृत्तविषयक विशेषत: शासकीय मजकुरासाठी आहे. या दोन माध्यमांचा प्रभावी वापर करणाऱ्या पत्रकारितेच्या क्षेत्रातील व्यक्तींना या पुरस्कारासाठी सहभाग घेता येईल. समाज माध्यमातील पत्रकारिता ही स्पर्धेच्या संबंधित वर्षातील असावी. हे लेखन किमान एक वर्षापासून सुरु असावे. या माध्यमाचा वापर करताना केंद्र शासनाने विहीत केलेल्या मार्गदर्शक सूचनांचा अवलंब केलेला असावा. प्रवेशिका पाठविताना अर्जदाराने व त्यांचे नामनिर्देशन ज्या व्यक्ती/संस्था/संघटना करतील त्यांनी संकेतस्थळ व ब्लॉग या समाज माध्यमांद्वारे करण्यात आलेल्या प्रसिद्धींची उदाहरणे व ती कोणत्या तारखेस प्रसारित झाली त्यांच्या मुद्रीत प्रती (प्रिंट आऊट) सादर कराव्यात.  विविध पुरस्कारासाठी असलेल्या अटी या गटासाठी लागू राहतील.

स्वच्छ महाराष्ट्र जनजागृती पुरस्कार

            केंद्र शासनाचे “स्वच्छ भारत अभियान” आणि राज्य शासनाचे “स्वच्छ महाराष्ट्र अभियान” प्रभावीपणे राबविले जात आहे. आपल्या लेखनातून लोकांमध्ये स्वच्छता विषयक जनजागृती करणाऱ्या पत्रकारांसाठी ही स्पर्धा आहे. या स्पर्धेत मराठी, हिंदी, इंग्रजी, उर्दू भाषेतील वृत्तपत्रांमध्ये लेखन करणाऱ्या पत्रकारांना तसेच ईलेक्ट्रॉनिक्स माध्यमांमधील पत्रकारांना सहभागी होता येईल.

स्वच्छ भारत अभियान, स्वच्छ महाराष्ट्र अभियान, महाराष्ट्र स्वच्छता अभियान (नागरी), संत गाडगेबाबा ग्रामस्वच्छता अभियान, हगणदारीमुक्त गाव योजना, घनकचरा व्यवस्थापन, सांडपाणी व्यवस्थापन, घनकचऱ्यामधून बायोगॅस तसेच वीज निर्मिती इत्यादी बाबत लेखन केलेले असावे.शासनस्तरावरुन राबविण्यात येत असलेल्या स्वच्छताविषयक योजनांची प्रसिध्दी, स्वच्छता अभियान लोकसहभाग वाढविण्यासाठी लेखनाद्वारे करण्यात आलेले प्रयत्न, स्वच्छतेचे महत्व पटविण्यासाठी करण्यात आलेल्या जनजागृतीपर लेखन यांचा या स्पर्धेत अंतर्भाव होईल. स्पर्धेसाठी असणाऱ्या सर्व अटी या गटासाठी लागू राहतील.

इलेक्ट्रॉनिक माध्यमातील पत्रकारांसाठी स्पर्धा

        इलेक्ट्रॉनिक माध्यमातील पत्रकारांसाठी “पु.ल.देशापांडे उत्कृष्ट दूरचित्रवाणी वृत्तकथा पुरस्कार” देण्यात येतो. ही स्पर्धा मराठी भाषेतील वृत्तकथेसाठी असून दूरदर्शन, खाजगी चित्रवाहिन्या, स्थानिक केबल न्यूज व शासकीय उपक्रम यांना यामध्ये सहभाग घेता येईल. वृत्तकथाचित्रे ही स्पर्धेच्या संबंधित वर्षात तयार केलेली व प्रसारित झालेली असावीत. वृत्तकथा किमान 3 मिनिटे असावी. प्रवेशिका पाठवितांना संबंधित प्रतिनिधीची माहिती तसेच वृत्तकथा कोणत्या तारखेस प्रसारित झाली, याबाबतचे संबंधित संस्था प्रमुख/संपादक यांचे प्रमाणपत्र जोडलेले असावे. स्थानिक केबलच्या बाबतीत संबंधित जिल्हाधिकाऱ्यांचे नोंदणीपत्र सादर करणे आवश्यक आहे.

            प्रवेशिकेसोबत संबंधित वृत्तकथेची सीडी/कॅसेट थेट त्या त्या विभागातील उपसंचालक /जिल्हा माहिती अधिकारी यांच्याकडे तर मुंबईकरिता, उपंसचालक (वृत्त), माहिती व जनसंपर्क महासंचालनालय, तळमजला,  हुतात्मा राजगुरु चौक, मादाम कामा मार्ग, मंत्रालय, मुंबई-32 यांच्याकडे पाठविण्यात यावी. मराठी वृत्तचित्रकथा राज्यस्तरीय पुरस्कारासाठी थेट प्राप्त झालेल्या नावांमधून, पुरस्कारपात्र विजेत्यांची निवड करण्यात येईल. इलेक्ट्रॉनिक माध्यमांतील तज्ज्ञ व्यक्तींची परिक्षण समितीवर नियुक्ती  करण्यात येईल. स्पर्धेसाठी असणाऱ्या सर्व अटी या गटासाठी लागू राहतील. 

                              छायाचित्रकार पुरस्कार

“तोलाराम कुकरेजा उत्कृष्ट वृत्तपत्र छायाचित्रकार पुरस्कार” स्पर्धा, ही मराठी, इंग्रजी, हिंदी, उर्दू भाषेतील वृत्तपत्रातील पूर्णवेळ छायाचित्रकारांसाठी आहे. यात सामाजिक संदेश देणारी छायाचित्रे, समाजातील प्रश्न मांडणारी छायाचित्रे, शासकीय योजनांचा प्रचार आणि प्रसारासाठी पूरक ठरतील अशी छायाचित्रे यांच्यासह प्रवेशिका सादर करता येईल.

            महाराष्ट्र शासनाच्या विविध लोकोपयोगी योजनांवरील छायाचित्र ग्राह्य धरण्यात येईल. मात्र हे छायाचित्र मूळ स्वरुपातील असावे. फोटो प्रत नसावी. पुरस्कारासाठी छायाचित्रकारांची मागील 5 वर्षाची कामगिरी, त्यांची सामाजिक बांधिलकी, शासनाच्या विकासविषयक कामाच्या प्रसिध्दीसाठी जाणिव जागृतीसाठी त्यांनी केलेले प्रयत्न आणि पुरस्कार देण्यात येणाऱ्या वर्षातील त्यांची कामगिरी यांचा विचार केला जाईल. एकाच छायाचित्रकाराला सलग दोन वर्ष पुरस्कार प्राप्त झाला असल्यास, तिसऱ्या वर्षी त्याची प्रवेशिका विचारात घेतली जाणार नाही. पुरस्कारासाठी पाठवावयाच्या प्रवेशिकेसोबत मूळ छायाचित्रे पाठविण्यात यावीत. ज्या नियतकालिकात छायाचित्र प्रसिध्द झाले असेल, त्या नियतकालिकाच्या संपादकांचा दाखला, तारीख, नियतकालिकाचे नाव प्रवेशिकेसोबत जोडलेले असावे. अन्यथा त्या प्रवेशिकेचा विचार केला जाणार नाही.

केकी मूस उत्कृष्ट छायाचित्रकार पुरस्कार, शासकीय गट (मावज)

माहिती व जनसंपर्क महासंचालनालयामध्ये छायाचित्रकार म्हणून काम करणारे कर्मचारी या स्पर्धेमध्ये भाग घेऊ शकतात.

पत्रकार सुधाकर डोअीफोडे अग्रलेखन पुरस्कार

ज्येष्ठ पत्रकार सुधाकर डोअीफोडे यांनी त्यांच्या लेखणीद्वारे समाजातील अनिष्ट प्रथा आणि अंधश्रद्धा यावर सातत्याने आसूड ओढले. आपल्या अग्रलेखांद्वारे प्रभावीरीत्या सामाजिक जाणीव जागृती करणारे संपादक म्हणून सुधाकर डोअीफोडे यांनी पत्रकारितेच्या क्षेत्रात आपला ठसा उमटवला. विविध विकासकामांची विशेषत: शासकीय विकासकामांची त्यांनी आपल्या अग्रलेखाद्वारे सकारात्मक प्रसिद्धी केली. विविध विकासकामांची दखल, आपल्या अग्रलेखांद्वारे घेणाऱ्या पत्रकार/संपादकांना, पत्रकार सुधाकर डोअीफोडे अग्रलेखन पुरस्कार देण्यात येईल.

या स्पर्धेसाठी मराठी, हिंदी, इंग्रजी, उर्दू भाषेतील संपादकांना सहभाग घेता येईल. या स्पर्धेसाठी लिहिलेले अग्रलेख हे स्पर्धेच्या संबंधित वर्षातील असावे.

            प्रवेशिका पाठविताना अर्जकर्त्याने वृत्तपत्रामध्ये प्रसिद्ध झालेल्या किमान 25 अग्रलेखांची कात्रणे त्याच्या प्रसिद्धीच्या तारखेच्या माहितीसह सादर करावे.

            इतर पुरस्कारांसाठी असलेले इतर सर्व नियम व अटी या पुरस्कारासाठीही लागू असतील.

उपरोक्त सर्व स्पर्धेविषयीची माहिती आणि अर्जाचे नमुने dgipr.maharashtra.gov.in या संकेतस्थळावर उपलब्ध आहेत. जिल्हा माहिती अधिकारी, उपसंचालक, विभागीय माहिती कार्यालय, संचालक, नागपूर-अमरावती व संचालक, औरंगाबाद, महाराष्ट्र परिचय केंद्र, पणजी-गोवा तसेच नवी दिल्ली आणि वृत्त शाखा, माहिती व जनसंपर्क महासंचालनालय, तळमजला, हुतात्मा राजगुरु चौक, मादाम कामा मार्ग, मंत्रालय, मुंबई -32 येथे उपलब्धआहेत.

या स्पर्धेत राज्यातील पत्रकारांनी अधिकाधिक संख्येने सहभागी व्हावे, असे आवाहन माहिती व जनसंपर्क महासंचालनालयाच्यावतीने करण्यात येत आहे.

****

विभागीय लोकशाहीदिनी 9 प्रकरणे सादर

अमरावती, दि. 13 : आज आयोजित विभागीय लोकशाही दिनात 9 प्रकरणे सादर करण्यात आली. या प्रकरणांवर आणि एकूणच लोकशाही दिनात सादर करण्यात आलेल्या प्रकरणांवर त्वरीत कार्यवाही करण्यात यावी असे विभागीय आयुक्त पियूष सिंह यांनी यावेळी सांगितले. प्रत्येक महिन्यातील दुसऱ्या सोमवारी लोकशाही दिनाचे आयोजन केले जाते. त्यानुसार आज विभागीय आयुक्त कार्यालयाच्या सभागृहात आयोजीत लोकशाही दिनात श्रीमती वैशाली पाथरे यांनी विभागातील विविध कार्यालयांशी निगडीत नऊ प्रकरणे सादर केली.

****

शासकीय स्थानिक सुट्या जाहिर

शासकीय  स्थानिक सुट्या जाहिर

अमरावती, दि. 4 : विभागीय आयुक्त पियुष सिंह यांनी त्यांना प्रदान करण्यात आलेल्या विशेषाधिकारानुसार स्थानिक सुट्या जाहिर केल्या आहेत. दि. 3 ऑगस्ट रोजी रक्षाबंधन, दि. 26 ऑगस्ट रोजी जेष्ठागौरी पूजन व  दि. 17 सप्टेंबर 2020 रोजी सर्वपित्री अमावस्येची सुटी ह्या संपूर्ण जिल्ह्याकरीता लागू राहील.

अमरावती जिल्ह्यातील दिवाणी फौजदारी  न्यायालये व अधिकोष यांना हा आदेश लागू होणार नाही, असे विभागीय आयुक्त पियूष सिंह यांनी एका आदेशान्वये कळविले आहे.

****

विभागीय आयुक्त कार्यालयात सावित्रीबाई फुले यांना अभिवादन

विभागीय आयुक्त कार्यालयात

सावित्रीबाई फुले यांना अभिवादन

अमरावती, दि. 3 : येथील विभागीय आयुक्त कार्यालयात सावित्रीबाई फुले यांच्या जयंतीनिमित्त विभागीय आयुक्त पीयूष सिंह यांनी प्रतिमेला पुष्पहार अर्पण करून अभिवादन केले.

पुनर्वसन उपायुक्त प्रमोद देशमुख यांनीही हारार्पण करुन अभिवादन केले. यावेळी अधिकारी, कर्मचारी उपस्थित होते.

00000

मंत्री यशोमती ठाकूर यांनी केली गारपीटग्रस्त शेतीची पाहणी

मंत्री यशोमती ठाकूर यांनी केली

गारपीटग्रस्त शेतीची पाहणी

Ø  गारपीटग्रस्त भागाचे सर्व्हेक्षण करण्याचे निर्देश

अमरावती, दि. 3 : राज्य मंत्रिमंडळात समावेशानंतर पहिल्यांदाच दौऱ्यावर आलेल्या मंत्री यशोमती ठाकूर यांनी तिवसा तालुक्यातील शेंदूरबाजार येथील गारपीटग्रस्त शेतीची पाहणी केली. शेतकऱ्यांना मदत होण्याच्या दृष्टीकोनातून या नुकसानीचे सर्व्हेक्षण करण्याचे निर्देश त्यांनी यावेळी दिले.

श्रीमती ठाकूर यांनी सुरवातीला राजेंद्र घरडे यांच्या कापूस आणि तूर पिकांची पाहणी केली. त्‍यानंतर राजेंद्र सावरकर यांच्या केळीच्या बागेची पाहणी केली. यावेळी त्यांनी जिल्हा अधिक्षक कृषी अधिकारी यांच्याकडून गारपिटीने बाधित झालेल्या गावांची आणि पिकांच्या क्षेत्राची माहिती घेतली.

यावेळी श्रीमती ठाकूर यांनी गेल्या काळातील अवेळी पाऊस आणि आताही गारपीटीने अमरावतीसह विदर्भातील कापूस, तूर आणि फळबागांचे नुकसान झाले आहे. या भागातील शेतकऱ्यांना मदत व्हावी, यासाठी दोन दिवसांत नुकसानीचे सर्व्हेक्षण करण्याच्या सूचना त्यांनी कृषि विभागाला दिल्या. शेतकऱ्यांना मदतीबाबत उपमुख्यमंत्री अजित पवार आणि मंत्री बाळासाहेब थोरात यांना माहिती देण्यात आली आहे. शेतकऱ्यांच्या मदतीचा प्रश्न मंत्रिमंडळाच्या बैठकीतही मांडण्यात येईल. तसेच शेतकऱ्यांना मदत करून त्यांना दिलासा देण्याचे काम निश्चितपणे करण्यात येईल, असे सांगितले.

श्रीमती ठाकूर यांचे विविध राष्ट्रपुरूषांना अभिवादन

अमरावती जिल्ह्याच्या पहिल्याच दौऱ्यात श्रीमती ठाकूर यांनी आज सकाळी गुरुकुंज मोझरी येथील राष्ट्रसंत तुकडोजी महाराज यांच्या समाधीचे दर्शन घेतले. यावेळी त्यांनी समाधीस्थळावर पुष्पार्पण केले. त्यानंतर त्यांनी ध्यान केंद्रांलाही भेट दिली. तसेच त्यांनी अखिल भारतीय श्रीगुरुदेव सेवा मंडळाच्या केंद्रीय कार्यालयाला भेट दिली. समितीच्या वतीने श्रीमती ठाकूर यांचा शाल, श्रीफळ देऊन सत्कार करण्यात आला. यावेळी समितीचे अध्यक्ष जनार्दन बोथे गुरूजी उपस्थित होते. श्रीमती ठाकूर यांनी समितीने आतापर्यंत दिलेल्या सहकार्याबद्दल आभार व्यक्त केले. तसेच येत्या काळात समितीला संपूर्ण सहकार्य करण्यात येईल, असे सांगितले

अमरावती येथील पंचवटीतील डॉ. पंजाबराव देशमुख यांच्या पुतळ्याला पुष्पार्पण करून अभिवादन केले. यावेळी आमदार सुलभा खोडके, आमदार बळवंत वानखेडे, जिल्हा परिषद अध्यक्ष नितीन गोंडाणे, शिवाजी शिक्षण संस्थेचे अध्यक्ष हर्षवर्धन देशमुख, विरेंद्र जगताप आदी उपस्थित होते. त्यानंतर श्रीमती ठाकूर यांनी इर्विन चौकातील भारतरत्न डॉ. बाबासाहेब आंबेडकर यांच्या पुतळ्याला अभिवादन केले.

0000000

सार्वजनिक कामे तातडीने पूर्ण करावीत - राज्यमंत्री बच्चू कडू

सार्वजनिक कामे तातडीने पूर्ण करावीत

-             राज्यमंत्री बच्चू कडू

*आढावा बैठकीत अधिकाऱ्यांना निर्देश

अमरावती, दि. 3 : नागरिकांच्या दैनंदिन जीवनात आवश्यक असलेली फेरफार, सातबारा यासारखी कामे जलदगतीने पूर्ण करावीत, अधिकाऱ्यांनी नागरिकांना उत्कृष्ट सेवा द्यावी, असे निर्देश राज्यमंत्री बच्चू कडू यांनी अचलपूर येथील उपविभागीय अधिकारी कार्यालयात आढावा बैठकीत दिले. यावेळी उपविभागीय अधिकारी संदीपकुमार अपार आणि संबधित विभागाचे अधिकारी उपस्थित होते.

जलयुक्त शिवार योजना व पांदण योजनेबाबत बच्चू कडू यांनी माहिती घेतली. यावेळी त्यांनी पांदण रस्ता व जलयुक्त शिवार ही दोन्ही कामे पूर्ण होण्यासाठी सर्व नद्यांवर एक किलोमीटरपर्यंत निघणाऱ्या खनिजांचा पांदण रस्त्याच्या कामात उपयोग करुन घेण्यात यावा. याबाबतचा एकत्रित प्रस्ताव गटविकास अधिकारी यांनी तातडीने सादर करण्यास त्यांनी सांगितले. उपविभागात 342 पांदण रस्ते प्रस्तावित असून याकरिता स्वातंत्र संग्राम सैनिक, गणेश मंडळ तसेच संबंधित गावातील नागरिक व निमशासकीय कर्मचारी यांची तालुकास्तरावर समिती गठीत करुन त्या समितीने नवीन पांदण रस्ताच्या खर्चाचे अंदाजपत्रक सादर करण्याच्या सूचना त्यांनी केल्या. जुन्या व नवीन खचलेल्या विहिरींबाबत एकत्रित पंचनामे पूर्ण करावे, असे चांदूरबाजार तहसिलदारांना सांगितले. अतीवृष्टीमुळे खचलेल्या विहिरींचे सर्व्हेक्षण करावे, पिकविमा योजना व प्रधानमंत्री किसान योजनेच्या पात्र लाभार्थ्यांची यादी तालुका कृषि अधिकारी यांनी ऑनलाईन द्यावी, पात्र लाभार्थ्यांना याचा त्वरीत लाभ द्यावा, अचलपूर तहसील कार्यालयाने 200 आदिवासी समाजाचे जात प्रमाणपत्राबाबत प्रस्ताव तयार केले असून चांदूरबाजार तहसील कार्यालयात 207 प्रकरणे प्रलंबित असून ती तात्काळ निकाली काढावीत, तसेच शालेय जात प्रमाणपत्र वाटपाबाबत शाळानिहाय कार्यक्रम आखून महा ई-सेवा केंद्राच्या सहाय्याने विद्यार्थ्यांना त्वरीत जात प्रमाणपत्र वाटप करण्यात यावे, असे निर्देश दिले.

0000000

माहिती अधिकारचा निपटारा करण्यासाठी निर्णय प्रणाली सॉफ्टवेअर कार्यान्वित

माहिती अधिकारचा निपटारा करण्यासाठी

निर्णय प्रणाली सॉफ्टवेअर कार्यान्वित

Ø  ई-मेल दूरध्वनी नोंदणी आवश्यक

अमरावती, दि. 2 :  माहितीच्या अधिकारातील प्रकरणांचा निपटारा गतीने करण्यासाठी निर्णय प्रणाली हे सॉफ्टवेअर विकसित करण्यात आले आहे. यासाठी अर्जदारांनी ई-मेल, दूरध्वनी, पत्ता आदी अनूषंगिक माहिती भरणे आावश्यक आहे.

माहिती अधिकार अधिनियम 2005 या कायद्यांतर्गत नागरिक शासकीय प्राधिकरणाकडे माहिती मागतात. या प्रक्रियेत जन माहिती अधिकारी व प्रथम अपिलीय अधिकाऱ्यांना माहिती मागणाऱ्या अर्जदाराचे योग्य माहिती देवून समाधान करता यावे आणि आयोगाकडील प्रलंबित प्रकरणांचा गतीने निपटारा करता यावा, म्हणून आयोगाच्या स्तरावर  ‘निर्णय प्रणाली’ सॉफ्टवेअर विकसित करण्यात आले आहे. या प्रक्रियेत संबंधित अर्जदारांना सुनावणीला उपस्थित राहण्याबाबतची नोटीस व पारीत होणारे आदेश निर्णय प्रणालीद्वारे पाठविण्यात येणार आहे. निर्णय प्रणाली हे सॉफ्टवेअर कार्यान्वित करण्यासाठी प्रत्येक कार्यालयांच्या जन माहिती अधिकारी व प्रथम अपिलीय अधिकारी ई-मेल व दूरध्वनी क्रमांक संबंधिताकडून नमूद करुन घ्यावा, तसेच अपिलार्थीने आयोगाकडे द्वितीय अपील सादर करतांना अर्जामध्ये त्यांचा ई-मेल व दूरध्वनी क्रमांक आवर्जून नमूद करावा, असे कक्ष अधिकारी देविसिंग डाबेराव यांनी कळविले आहे.

****